Ակադեմիայի մասին
«Մխիթար Գոշ» Համահայկական ակադեմիայի առաքելությունը նոր ազգային ազնվականության պատրաստումն է` ի դեմս ինտելեկտուալ և քաղաքական մի շերտի, որը գիտակցաբար կստանձնի հայ էթնոսի և ապագա հայ ազգի ֆիզիկական ու հոգևոր անվտանգության համար պատասխանատվությունը:
Հայ էթնոսը վերապրել է բազմադարյա սփռվածություն, Ցեղասպանություն, պետականության կորուստ և անվանական անկախության երեսուն տարի: Առանց սեփական ազնվականության, առաջնորդների վերարտադրման ներքին ինստիտուտների, առանց համընդհանուր գաղափարախոսության հայ էթնոսը դատապարտված է «ժողովուրդ» մնալու` կորցնելով աշխարհի քաղաքական քարտեզի վրա իր տեղը:
Որպեսզի Հայաստանը դառնա միջազգային քաղաքականության ինքնիշխան սուբյեկտ և ինքնուրույն կերտի հայ ազգի ճակատագիրը, անհրաժեշտ է միացյալ քաղաքական ու գաղափարախոսական հիմքով ազգային ազնվականություն` կրթված, քննադատական մտածողությամբ օժտված գլոբալ հայեր, որոնք պատրաստ են պաշտպան կանգնել հայկական ժառանգությանը։ Առանց դրա անհնար է թե՛ ինքնիշխանությունը, թե՛ երկարաժամկետ ազգային զարգացումը:
«Մխիթար Գոշ» Ակադեմիան կոչված է լուծելու հենց այդ խնդիրը: Մենք միավորում ենք հայկական աշխարհի լավագույն ներկայացուցիչներին` որպես դասախոսների և ունկնդիրների, ձևավորելով ապագա հայկական ազնվականության ինտելեկտուալ և սիմվոլիկ կապիտալը: Մենք կերտում ենք պետականամետ մտածողության տեր մարդկանց` այնպիսի անհատների, ովքեր ունակ են սթափ վերլուծել իրականությունը, հասկանալ, ձևակերպել և պաշտպանել հայկական պետության շահերը ու պայքարել հայկական գիտակցության և պետականության ապագաղութացման համար:
Մեր նպատակն է` հայ ազգը վերահաստատել որպես սեփական պետականության ինքնիշխան: Դրան հասնելու համար է, որ մենք ինտելեկտուալ ենթակառուցվածք ենք ձևավորում` պատրաստելու այնպիսի առաջնորդների, որոնք կկարողանան կերտել պատմությունը, ոչ թե կողքից դիտել, թե ինչպես են այն գրում և աղավաղում ուրիշները: Մենք հաստատում ենք մերիտոկրատիան` արժանիների իշխանությունը, որտեղ իշխանությունը, քաղաքական որոշումների ընդունմանը մասնակցելը և երկիրը ղեկավարելու իրավունքը պատկանում են նրանց, ովքեր ապացուցել են ազգին խելքով, ջանասեր աշխատանքով և պատվով ծառայելու իրենց պատրաստակամությունը:
«Մխիթար Գոշ» Ակադեմիան համահայկական կրթական համակարգ է` ուղղված հայկական աշխարհի առաջնորդների նոր սերնդի ձևավորմանը: Ակադեմիան միավորում է աշխարհի տարբեր կողմերից պասիոնար հայերի, որոնք կամենում են խորապես հասկանալ հայոց պատմությունը, քննադատորեն վերլուծել միջազգային գործընթացները և զարգացնել ռազմավարական մտածողություն` հանուն բացառապես հայկական շահերին ծառայելու և հայկական աշխարհի դիմակայությանն ու զարգացմանը նպաստելու:
Վերջին տարիները դառնորեն ապացուցեցին հայկական աշխարհի գլխավերևում կախված վտանգների առջև Հայաստանում և Սփյուռքում իշխող ֆեոդալ-կլանային համակարգերի անհուսալիությունը: Ակադեմիայում մենք կերտում ենք անհատների նոր շերտ, որոնք ունակ կլինեն լայն ազգային շահերի շրջանակներում մտածելու, նոր իմաստներ ստեղծելու, կայուն ինստիտուտներ հաստատելու և իրենց հետևից մեծամասնությունը տանելու:
«Մխիթար Գոշ» Ակադեմիան`
● դնում է քաղաքական փիլիսոփայության, հայոց պատմության և միջազգային հարաբերությունների ըմբռնման ամուր հիմք,
● ձևավորում է սկզբունքային պետականամետ` բացառապես հայկական շահերի շրջանակներում մտածողություն,
● միավորում է ապագա հայկական ազնվականությունը մեկ ինտելեկտուալ տարածության մեջ,
● ստեղծում է շրջանավարտների միջև կայուն կապեր և աջակցում է նրանց մտահղացումներին:
2025-2026 ուսումնական տարում ծրագիրը ներառում է 3 ամիս տևողությամբ մեկ կիսամյակ (2026 թ. փետրվար-ապրիլ): Ուսուցումն առցանց է, շաբաթը 3 անգամ, երեկոյան ժամերին (երևանյան ժամանակով): Ակադեմիայի դասախոսները համապատասխան ոլորտներում ճանաչված մասնագետներ են, ովքեր հայտնի են և՛ որպես հետազոտողներ ու փորձագետներ, և՛ որպես հաստատակամ պետականամետներ:
Ակադեմիա կընդունվեն առավելագույնը 20 լավագույն թեկնածուները` էսսեի գնահատականի և հարցազրույցի արդյունքներով: Ծրագրի ավարտը ուղեկցվում է Հայկական Հանրապետության Գաղափարախոսական Դրույթների վրա երդմամբ` պարտավորվելով ապրել և գործել դրա սկզբունքների համաձայն: Շրջանավարտները ստանում են Հայկական Հանրապետության դրոշմով մատանի` որպես նոր ազգային ազնվականություն ձևավորող ինտելեկտուալ-գաղափարական խմբին պատկանելու խորհրդանիշ: Ակադեմիայի Հոգաբարձուների խորհուրդը բազմակողմանի աջակցություն է ցուցաբերելու հաջողակ շրջանավարտներին` նրանց աճին, կարիերային, ակադեմիական, հասարակական ու քաղաքական գործունեությանը նպաստելու համար: Արդեն իսկ ուսման ընթացքում լավագույն ուսանողներին կրթաթոշակ կնշանակվի:
Հայտերի ընդունման վերջնաժամկետը 2026 թ. հունվարի 8-ն է: Որքան շուտ ներկայացնեք հայտը, այնքան մեծ են հաջորդ փուլ անցնելու ձեր շանսերը։
